Bilboko Aste Nagusirako bi hilabete eskas geratzen direnean, jaiek badute aurtengo ediziorako kartela. Mario Larrinaga Mochales (Bilbo, 1999) garaile atera zen atzo kartel lehiaketan, “Camino a Bilbao” (“Bilborako bidean”) obrarekin. Artista bilbotarrak sortutako kartelak hiriko kaleak hartuko ditu abuztuaren 16tik 24ra. Kartel irabazlea atzo goizean aurkeztu zuten Bilboko udaletxean egindako prentsaurrekoan. Guztira, 222 proposamen aurkeztu zituzten: 72 Bilbokoak, 72 Euskal Herriko beste udalerrietakoak, 59 espainiar Estatukoak eta 19 beste herrialde batzuetakoak. Ehunka proposamenetatik epaimahaiak sei finalista aukeratu zituen eta Mario Larrinagaren kartela gailendu zen, botoen %43,77 eskuratuz. «Gure Aste Nagusiaren espirituarekin bat dator kartela: inklusiboa, askotarikoa eta munduari irekia», nabarmendu zuen Itziar Urtasun Jai Batzorde Mistoko presidente eta Berdintasun eta Jaietako zinegotziak. Nolanahi ere, kartelean «akats larri» bat dagoela aitortu zuen artistak barre artean: «Ikurrinaren koloreekin erratu naiz. Aitortzen dut bizitza osoan egin dudan akatsa dela, baina zuzentzeko aukera dago».