Zinema, zinemaren barruan. Hori izango da Ferzan Özpetek-en helduleku nagusia istorioa garatzeko. Zuzendari batek bere aktore gogokoenak bildu nahi ditu 70eko hamarkadako Erroman girotutako pelikula bat filmatzeko, zeinak izen handiko jostundegi baten gorabeherak kontatzen dituen. Filmak emakumeei buruzko istorio bat azalduko du; gizonezkoek, aldiz, bigarren mailako eta marjinalagoak diren rolak izango dituzte.

ELKARTASUNA ETA AHIZPATASUNA

Filmak ahizpatasunaz dihardu; hitz hori garai hartan ez zen existitzen edo ez zen hain zabaldua, baina batez ere elkartasunaz ari da. «Egia esan, ahizpatasunaz baino gehiago, nire filmean elkartasunaz hitz egiten dela uste dut; emakumeen arteko elkartasunaz, jada existitzen zena eta 70eko hamarkadan aipatzen zena. Lan batean emakume asko daudenean, batez ere sormen lanetan, beti dago elkartasuna. Sarritan ikusten nuen hori antzerkietako jostundegietan eta zinemarako lanean», aipatu du zuzendariak elkarrizketa batean.