Sagarraren uzta sasoi betean sartuta gaude. Testuinguru horretan, “Udazken zaporez” lelopean, Astigarragan ospakizunak egin dituzte asteburuan. Sagarraren jaia egin zuten atzo, goizean goiz hasita, ekitaldi mordoxkarekin: txistularien diana, sagar bilketa, sagarraren kalejira herrian barrena, azoka berezia -herriko baserritarrek beren produktuak erakutsi eta saltzeko modua izan zuten-, sagar dantza, pilota partidak... Eta bazkalaurretik, 2025eko uztako estreinako muztioarekin topa herrikoia egin zuten.