Ohitura duenez, Donostiako San Tomas azoka jardueraz gainezka dator aurten ere. Txistorra, fruta, barazkiak, eztia eta beste hainbat gai saltzeko 163 postu izango dira zortzi gunetan, eta auzoetara ere zabalduko da, atzo iragarri zutenez. Protagonista “Poxpolin” txerria izango da, azoka egunerako 370-380 kilo arteko pisua izango duena. Gainera, sei lehiaketa izango dira: Txistorra Gastronomian lehiaketa, lur gaiena, Donostialdeko ezti lehiaketa, txorimaloen erakusketa lehiaketa, Euskal Herriko XIX. Txistor Lehiaketa eta baserritar jantzien lehiaketa.