Joan den astean Donostiako Aste Nagusian Pentsiodunen Mugimenduak egin zuen bezala, gaur, astelehena, Bilboko Aste Nagusian, Bilboko eta Bizkaiko Pentsiodunen Mugimenduak manifestazioa egin dute guztiontzako pentsio publiko eta duinak aldarrikatzeko.

«Dagoeneko 7 urte baino gehiago dira borrokan, non hobekuntza batzuk lortu ditugun baina tinko jarraitzen dugu eta pentsio publikoen aldeko borrokarekin jarraitzeko prest gaude, guztiontzat nahikoak eta duinak izango diren pentsioen alde, baita gure osasunarekin, zaintzarekin eta bizitzarekin zerikusia duten beste aldarrikapen batzuen alde ere», aldarrikatu dute.

12.00etan hasi da martxa plaza Eliptikotik eta, Kale Nagusia eta Buenos Aires kalea zeharkatu ondoren, udaletxean amaitu da. Txistulari talde bat eta mugikortasun urriko pentsiodun batzuk izan ditu buru. Mobilizazioa errebindikatzailea izateaz gain, alaia eta jai girokoa izan da.

EHPMren ohiko beste aldarrikapen batzuk alde batera utzi gabe, demanda nagusia izan da EAEko parlamentuan aurkeztutako ILP izapidetzeko onartzea, eztabaidatzea eta bozkatzea. Azken hilabete hauetan sinadurak biltzeko kanpaina indartsu eta arrakastatsua egin dute ekimenari babesa emateko. 145.142 sinadura batu dituzte eta ostegun honetan aurkeztuko dituzte Gasteizko Legebiltzarrean.

Oraindik bidea geratzen zaie eta, ohartarazi dutenez, datozen hilabeteak erabakigarriak dira eta helburu hori lortzeko hainbat mobilizazio eta ekimen prest dituzte. Irailaren 8an, astelehena, Hego Euskal Herri osoan EPMren elkarretaratzeak berrabiaraziko dituzte eta egun horretan beste ekimen batzuk aurkeztuko dituzte.

Era berean, gaurko mobilizazioan oso presente egon da Israelek herri gazatar eta palestinarraren genozidioa eta inoiz baino indar handiagoz mobilizatzeko beharra, basakeria sionista geldiarazteko.