Euskal Herriko Trikitixa Eguna ospatu zuten atzo Iruñean. «Zailtasunez betetako antolaketa» lanen ondoren, 600dik gora trikitilari bildu ziren, Nafarroako hiriburuko kaleak eta plazak arin-arin, fandango eta bestelako doinuekin betez. Bilkura hitzordua 11.00etan zuten hiru tokitan, eta hortik abiatu zituzten kalejirak, 12.30ak aldera kontzertuei ekiteko: Miren eta Roberto Etxebarria, Trikiteens eta Itzal arduratu ziren, bakoitza plaza banatan, jendea dantzara ateratzeaz. Bazkalostean, denek elkarrekin kalejira egin zuten Gaztelu plazaraino, han festari amaiera emateko.