NAIZ.INFO
BAIONA

EH Baik agerraldia egingo du gaur bigarren itzuliari begira dituen asmoak azaltzeko

Euskal Herria Bai koalizioak 11.500 boto jaso zituen igandeko bozetan eta gaur agerraldia egingo du emaitzok baloratu eta igandean egingo den bigarren itzuliari begira bere jarrera zein izango den zehazteko.

Jean Lassalle, iazko abuztuan Larrañen, ‘Telesforo Monzon’ pastoralean, François Hollande agurtzen. (Bob EDME)
Jean Lassalle, iazko abuztuan Larrañen, ‘Telesforo Monzon’ pastoralean, François Hollande agurtzen. (Bob EDME)

Euskal Herria Bai koalizio abertzaleak igandeko bozetan lortutako emaitzek sekulako garrantzia hartu dute Legebiltzarrerako hauteskundeen bigarren itzuliari begira.

Izan ere, abertzaleek osatutako koalizioak, hirugarren indarra izaki, badu zer esana hiru barrutietan. Laugarrenean, %14 lortuta (Ipar Euskal Herrian), Jean Lassalle (MoDem) eta Frantxoa Maitiaren (PS) arteko lehian erabakigarriak izango dira.

Kazeta.info atzo agerkariak zabaldu zuenez, astelehenean PSko ordezkariekin bildu zen EH Bai eta atzo, berriz, Jean Lassalle MoDem alderdiko eta laugarren barrutiko diputatu zentristarekin hitzordua zuten finkatua.

11.500 boto jaso zituen koalizioak lehen itzulian eta, zenbakiak begiratuta, heldu den iganderako abertzaleen indarra erabakigarria izango da PSko hautagaientzat, batez ere IV. eta VI. barrutietan. Bosgarrenean, berriz, badirudi oraingoan Colette Capdevielle PSko hautagaiak aparteko arazorik ez duela izango Jean Grenet gainditzeko.