Amaia Ereñaga|2018/08/05 00:00

Irimo (901 m) mendiaren magalean, ikusmenean Urretxu eta Zumarraga dauzkan jauregi bat altxatzen da, Ipeñarrieta izenekoa. Han dago, harro, dotore, iraganeko distirak eta nahigabeak gogoan izango balitu bezala. Lau mendeko istorioak gordetzen ditu eraikin honek bere harrien artean, XVI-XVII.eko Austriako etxearen gortean boteretsu bihurtu zen Ipeñarrieta maiorazkoarenak eta, era berean, azken 250 urteetan lur hauek landu dituzten Izagirre leinukoenak. Bi mundu: bata, jauntxoena, galdua jada; bestea, baserritarrena, desagertzear.