Andoni Urbistondo|2019/06/09 00:00

Mendiak daude. Mendi asko. Ikaragarriak. Marrazki bizidunetakoak. Bidea kabitu ezinik egiten duten erreka urtsuak, patata soro eta pinudiak, glaziarrak, asto, mando eta jak-ak… eta nepaldarrak, noski. 10.000 mendi gidari daude, eta milaka zamari gehiago, tartean, azken asteetan irudi sonatu eta krudelak utzi dituen Everesteko gailurrerako bidelagun direnak. Trekking-ak haiek gabe egin daitezke, baina haiekin erosoagoak dira turistarentzat, eta aberasgarriagoak. Gidariak behar beste lagunduko zaitu bide osoan. Zamariak zure motxila eramango du, 30 kilo bizkarrean. 18 euro irabazten ditu gidariak eguneko, 12 zamariak. Zamariek ez dute euren burua esklabo edo morroi gisa ikusten, sosak irabazteko aukera bakarra baitute. Trekking-eko azken egunean bezeroak propina ematen die. Eskuzabal izatea haien lan nekosoa errespetatzeko modua da. Gidari eta zamariak baitira Himalaiako benetako aberastasuna.