“21 aulki” izeneko mikroerrezitaldi zikloa antolatu du Oiartzungo 100TZE sormen espazioak eta urtarrilean hasi eta apirilera bitarte Josu Landa, Goiatz Labandibar, Jose Luis Otamendi eta Metrokoadroka kolektiboko kideak izango dira errezitaldiak eskaintzen. Lehenengoa bihar bertan izango da. Josu Landak “Miguel Hernandez kantuz” errezitaldia eskainiko du, Munduko Poesia Kaierak bildumaren baitan plazaratutako antologia oinarri. Bigarren hitzordua otsailaren 25ean izango da, Goiatz Labandibarrekin, eta hurrengo saioa martxoaren 17an izango da, Jose Luis Otamendirekin, eta apirilaren 28an, antzerki-irakurketa eskainiko du Metrokoadrokak.