GARA
HERRI KIROLAK

Urrezko Kopan, Arria V.a eta Irazu Zizurkilen

Igandean, 12.00etan Zizurkilgo Intxaur pilotalekuan, Urrezko Aizkolarien Kopako beste jardunaldi bat jokatuko da, kanporaketa interesgarria. Herriko aizkolari Jon Irazu eta bere aurkari Xabier Orbegozo Arria V.a arituko dura. Lana, hamabina etzaniko kana-erdiko ebakitzea.

Bestetik, harri-jasotzaileak jardungo dira, Gabonetako Kopako seigarren kanporaketan; Jon Gisasola Zelai V.a eta Josetxu Urrutia, Martikorena ordezkatzen. Erabiliko dituzten harriak hiru dira: 100 kiloko zilindroa, kubikoa eta bola. Bakoitzarekin hiru minutuko txanda izango dute. Irabazleak Inhar Urruzunoren aurka jokatuko du.

III. Mailako finala Larrabetzun

Igandean, 12.00etan, jokatuko da Larrabetzun hirugarren mailako txapelketa. Parte hartzaileak, Julen Larrea, Jexus Etxeberria, Beñat Lekue, Hodei Ezpeleta, Jokin Alkizalete eta Goizeder Beltza izango dira. Lana: kana-erdiko hiru pago enbor eta 60 ontzako etzaniko bi enbor.

Biarritz eta Artziniega

Larunbatean Euskal Herri Mailako lauko sokatirak Biarritzen du zita, 17.00etan. 320 kilotan hirugarren jardunaldia jokatuko dute Gaztedik, puntu gehien duenak, bigarrengo den Ibarrak, hirugarren Donazaharrek eta, azkenak, Napurrak-ek.

Igandean 280 kilotan talde mistoak izango dira. Lehen jardunaldia Artziniegan jokatuko da, Bekaldeko kiroldegian, 11.30ean. Kategoria honetan sei taldek neurtuko dituzte indarrak: Arabako Bizindar, Laukizko Gaztedi, Ibarra Gipuzkoatik eta Nafarroatik Antsoain, Berriozar eta Beti-Gazte.