Surf egiteko behar den osagai nagusia olatua da; beraz, olatu batekin eta surf taula batekin jada surf egin daiteke. Beste kontu bat da olatuaren kalitatea, baina olatuak badira, surf egiteko aukera irekia da. Gauzak horrela, itsaskiak handiak direnean ere badira maila guztietako surflariek surf egin dezaketen lekuak, baita eguraldia narrasa denean ere.

Jarraian Euskal Herriko kostaldeko zenbait leku agertzen dira, baina aurrez ohartarazpen bat: hautatutako lekuak surfean hasiberriak direnentzat edo maila ertaineko surflarientzat dira. Edonola ere, surflariaren maila zenbat eta handiagoa izan, surf egiteko lekuen aukera ere orduan eta zabalagoa da.

Azken egunetan bezalako haizete indartsuak eta itsaski handiak direnean surf egiteko aukera eskaintzen duten lekuen berri emango dugu jarraian, baina kontuan hartu behar da halako egunetan baldintzak oso gutxitan izaten direla egokiak «olatu onak» hartzeko, eta eurite mardulen ostean uraren kalitatea ere txarragoa izaten dela. Hala ere, egun eguzkitsu batean baino olatu hobeak hartzeko aukera ere izan daiteke, noiz eta nora joan baldin badakigu.

Kontuan hartu behar da itsaskiak eta eguraldia bi osagai desberdin direla. Hau da, itsaskiak handiak direnean olatu txikiagoak hartzeko leku anitz dira baina, eguraldiari dagokionez, leku guztiek ez dituzte ezaugarri berak; horregatik, jarraian aurkezten diren lekuetan surferako baldintza hoberenak zein kasutan ematen diren azalduko dugu.

Zehaztasun gehiago nahi dituenak NAIZ dendan salgai dagoen “Euskal Herriko Surf Gida” liburuan aurkituko ditu. Bertan agertzen diren Lapurdi, Gipuzkoa eta Bizkaiko 89 urautsien artean agertzen dira jarraian aurkeztuko ditugunak ere.

Bizkaia

Mendebaldetik ekialdera, Bizkaian badira itsaski bortitzetatik babestuta dauden hainbat hondartza eta urautsi. Gehiago badira, baina Ereaga eta Plentzia-Gorlizeko hondartzak hautatu ditugu artikulu honetarako.

Getxoko udalerrian dagoen Ereaga hondartzan olatuak izateko itsaski handiak behar dira, hondartza honen kokalekua ez baitago kostaldean, Bilboko itsasadarrean baizik. Arriluze kai-muturraren eta Algortako portuaren artean dago Ereagako hondartza eta hondoen arabera urautsi desberdinak eskaintzen ditu; beraz, olatu mota desberdinak ere izaten dira.

Esaterako, itsasgoran urertzetik gertu lehertzen diren piko formako olatuak izaten dira sarri, bodyboard zaleentzat egokiak, olatu azkarrak baitira. Itsasbeheran, ostera, kostatik urrunago, ezker-eskuin lehertzen diren olatuak altxatzen dira, trebatze fasean dauden surflarientzat eta longboard zaleentzat egokiak.

Ereagako hondartza ipar-mendebaldera begira dago; beraz, haize egokienak ekialdekoak eta hegoaldekoak izaten dira; horregatik, azken egunetan bezala, haizeak iparraldetik edo mendebaldetik jotzen badu, olatuak narrasak izaten dira, eta gainera, Bilboko itsasadarraren albo batean dagoen hondartza denez, uraren kalitatea txartu egiten da. Hala ere, uraren kalitatea duela hogei urte baino askoz hobea da.

Plentzia eta Gorlizeko hondartza Ereagakoa baino babestuago dago haizeteen aurrean; horregatik, haizearen norabidearen arabera hondartzaren alde batean edo bestean olatuek itxura hobea izan dezakete. Hasiberrientzat leku egokia da, hondoen arabera olatuak edonon altxatzen baitira.

Hondartzaren mendebaldea Plentziako udalerriari dagokio, eta bertan dagoen dikearen ondoan eskuin olatu bat ateratzen da itsaski handiak direnean. Hondartzaren beste aldea, ekialdea, Gorlizko udalerriari dagokio, eta eremu honetan ere haizeak kalte gutxiago egiten du babestuen dagoen aldean. Edonola ere, aukera asko eskaintzen dituen hondartza da, haize narrasak diren egunetan ere baldintzak ez baitira hain txarrak izaten. Iparraldeko haizeak soilik bihurritzen ditu olatuak.

Gipuzkoa

Donostian ere Santa Klarako uharteak itsaski handien sarrera galarazten du eta horren ondorioz, surf egitea posible izaten da Kontxako eta Ondarretako hondartzetan Zurriolan olatuak handiegiak diren egunetan.

Mendebaldean, hormari atxikita Teniseko ezker olatua altxatzen da; erdialdean, ostera, bi hondartzak bereizten diren tunelaren azpian, bodyboard zaleentzako olatu borobilak lehertzen dira itsasgoran, itsasbazterretik oso gertu. Kontxako badian, berriz, ihesbide laburreko olatu ahulak izaten dira itsasbeheran, surf egiten ikasteko egokiak.

Bada Donostian beste aukera bat baldintzak muturrekoak direnean. Itsaskiak oso handiak direnean eta koefiziente altuko itsasaldiak daudenean, olatuak Urumea ibaian gora sartzen dira itsasgoran eta longboard taulekin surf egiteko aukera ederra eskaintzen dute. Gainera, murruz inguratutako eremua denez, haizeteetatik babestua da.

Lapurdi

Donibane Lohizuneko badiak aukera anitz eskaintzen ditu. Parean dituen Artha izeneko hiru dikeen artean bi sarbide ditu itsasoak eta itsaskiak handiak direnean olatu bilakatzen diren uhin lerroak zabaltzen dira badiaren luze-zabalean, mendebaldean diren Zokoako hondartzetatik hasi eta ekialdean dagoen Santa Barbarako eremuraino.

Ipar-mendebaldeko haizeak kostalde osoko bazter guztiak narrasten dituenean, Zokoako kostaldean kontrako efektua eragiten du haizeak, lurretik itsasorako norabidea izaten baitu. Halako egunetan, itsaski handiak eta haizete narrasak direnean, maila desberdinetako surflarientzat olatu politak izaten dira Zokoako hondartzetan.

Badiaren beste aldean, berriz, eskuin olatu luze bat altxatzen da, maila ertaineko surflarientzat oso egokia, ibilbide luzea baitu. Aitzitik, eremu honetan mendebaldeko edo iparraldeko haizeak olatuak narrasten ditu eta hegoaldeko edo ekialdeko haizea behar du olatu ederrak eskaintzeko.