Greban dauden Bizkaiko nagusien egoitzetako langileek manifestazioa egin zuten atzo, aste honetan egin duten «Kalbarioko martxa» delakoari amaiera emanez. Aldundiak zerbitzua pribatizatu izanak 5.000 langile baino gehiagoren lan baldintzak prekarizatu eta zerbitzuaren kalitatea kaltetu duela salatzearekin batera, borrokan jarraituko dutela adierazi zuten. Pandemian azaldu zen arazoa, baina, osasun eta zaintza sistema indartsuen premiak pentsarazi zezakeenaren kontra, instituzio nagusien politikek bere horretan jarraitzen dute.