Andres Manuel Lopez Obrador Mexikoko presidente ezkertiarrak bere urteko bosgarren Gobernu txostena aurkeztu zuen atzo. Aurkezpenak bere presidentetzaren azken urtearen hasiera iragartzen du. Bere ondorengoa izendatzeko lehia gogorra biziko du ziurrenik.

Joan den asteazkenean ekin zion, hain zuzen, bere alderdiak, Movimiento Regeneracion Nacional-ek (Morena), 2024ko hautagai presidentziala hautatzeko inkestari.

Prozeduran, 12.500 galdetegi egingo dira etxez-etxe, sei izangaiekin boto-orri zirkular bat banatuz. Inkestatzaileak hautagaien ordezkariekin azalduko dira etxeetan.

Emaitza irailaren 6an, datorren asteazkenean, emango da jakitera.

Claudia Sheinbaum Mexiko Hiriko gobernadore-ohia da faboritoa; bere aldeko aldea handitu egin da azken astean.

Sheinbaumek 2024ko hauteskundeetan hautagai izateko lehentasunen %37 lortu du, bere aurkari hurbilena den Marcelo Ebrard kantziler ohia baino 15 puntu gehiago (%22). Datuek erakusten dutenez, abantaila 10 puntu hazi da joan den maiatzeko azken inkestarekiko; orduan, lehentasunen %31 zituen, Ebrardek baino bost puntu gehiago.

Andres Manuel Lopez Obrador (AMLO) presidentearen Kanpo Arazoetarako ministro izan zen Ebrardek «desordena handia» salatu du inkestan. Ebrardek hautsak harrotu zituen joan den abuztuaren 16an; Morenako, Gobernu federaleko eta Mexiko Hiriko Gobernuko funtzionarioei leporatu baitzien, Sheinbaumen alde, boto-emaileak mobilizatzeko baliabideak erabiltzea.

OPOSIZIOAREN HAUTAGAIA

Xochitl Galvez Ekintza Nazionala (PAN) eskuineko alderdiko senataria, jatorri indigenako ingeniaria, oposizioko Frente Amplio koalizioaren presidentegaia izango da. Koalizioa PANek, PRDk (jatorriz ezkertiarra) eta PRIk osatzen dute. Azken alderdi historiko honek bere hautagaia, Beatriz Paredes, erretiratu du.

Aita otomiarra eta ama mestizoa dituen Galvez AMLOrekin izan dituen liskarrak baliatzen saiatuko da.

Hala ere, inkestek diotenez, Sheinbaum aise gailenduko zaio, berak %44, eta Senatariak %27 boz eskuratuta.