Gabon gauean egindako ospakizunen artean Iruñekoa aipatzeak merezi du. Barcina eta Maya UPNko alkateek urteetan zehar Olentzeroren kalejirari eta ospakizunei traba zenbatezinak jarri ostean, herenegun estreinakoz ikazkina udaletxeko balkoian izan zen eta, arratsaldean, Cristina Ibarrola auzapezak (UPNkoa hau ere) harrera egin eta zapia jarri zion. Paradoxikoki, Ekialde Hurbileko hiru Errege Magoei ez die harrera egingo, sorpresarik ez badago, etzi zentsura mozio batek kargugabetuko baitu, EH Bilduko Joseba Asironen mesedetan.