‘‘Bi arnas’’ dokumentala ikusi ahal izango da gaur, 23.40ean, ETB-1en. Lehen aldiz programatu du kate publikoak, hots, Auzitegi Nazional espainolak bere protagonista, Iratxe Sorzabal, torturatua izan zela epai bidez onartu ondoren.

Sorzabalek jazotako tratu txar haien eragina du ardatz dokumentalak. Presoak eta bere ama Mari Nieves Diezen artean sortu den isilune luzeari erreparatzen dio. Izenburuari dagokionez, honako hau adierazia du Jon Mikel Fernandez zuzendariak: «Metafora bat genuen hasieratik, arnasarena, bi arnasa horiena. Torturaren itolarri hori urarekin, itsasoarekin, lotzen da. Itsasoaren gogortasuna, olatuak harkaitzen kontra jotzea... arnasa falta horren metafora dira. Eta bitxia da; Iratxeri ez genion hau esan, baina espetxetik audioa bidali zigunean itsasoaren metafora aipatzen du berak ere». Paco Etxeberria forentsea, Serge Portelli epailea eta Nekane Txapartegi -hau ere torturatua- mintzo dira dokumentalean Diez eta Sorzabalekin batera.