Rioko Complexo do Alemao favelan dozenaka haur ari dira lanean, helburu argi batekin: Brasilgo Bolshoi Eskolan sartzea, Errusiatik kanpo ballet ospetsuak duen filial bakarrean, Joinvillen (hegoaldean). Ikuskatzaile talde batek herrialdea zeharkatzen du, ikasturteko 40 plazak betetzeko talentu bila. Familientzat nabarmen aldatzen da bizitza. ViDançar egitasmoaren sortzaile Ellen Serrak gogoratzen du eskolara iritsi berria zen ama batek nola esan zion, pozez, txorien kantuarekin esnatu zela, «eta ez tiro hotsekin». Dantza, beraz, itxaropen iturri ere bada.