Ernaik ohar baten bidez jakinarazi du astelehen gauean ekintza bat egin zuela Dantxarineko aduanan. Argazkian ikus daitekeenez, pintura jaurti eta «gazteok independentzia» margotu zuen Frantziako aduanako garita batean kanpoaldean.

Gazte erakundeak adierazi zuenez, «Espainiak eta Frantziak Euskal Herria ukatzen dute» eta ekintza horrek «Euskal Herriaren barruko mugak» salatzea zuen helburu.

Ernaik “Ekinez egina, gazteok independentzia!” kanpainaren barruan kokatu zuen ekimena eta abenduaren 1etik 7rako aktibazio astea iragarri zuen. Egun horietan herri zein nazio mailan independentziaren eta antiespainolismoaren aldeko ekintza gehiago egingo dituela jakinarazi du.