Saizarren ere abian da, atzodanik, txotx denboraldia. Eta, aspaldian ohitura dutenez, aurpegi ezagun askoren laguntzarekin egin zuten upeletik estreinako tragoxka hori. Atzo, are eta arrazoi handiagoarekin: 50. txotx irekitzea zuen Usurbilgo sagardotegiak. Mende erdiko urteurren hori ekitaldi «oso berezi» batekin ospatu nahi izan zuten lertxundi-saizartarrek, «emozioz eta legendaz beteta».

Mito horiek futbol mundukoak izan ziren. Bereziki realzaleentzat aski sonatuak. Txotx garaiaren hasiera ofiziala egiteaz David Silva, Aitor “Txiki” Begiristain eta Roberto Carlos -Real Madrileko izar handi izana azken hau- arduratu ziren: haientzat izan zen estreinako txotxa, eta haiek oihukatu zuten bertaratutako guztientzat «hau da Usurbilgo Saizar sagardo berria!» leloa. Kanariarraren, olaberritarraren eta brasildarraren presentzia aski ez zelakoan-edo, 1981-82 eta 1982-83 denboraldietan Liga Euskal Herrira ekarri zuten Realeko futbolarien distira gehitu zen: Arconada, Zamora, Gorriz, Gajate, Larrañaga, Bakero, Lopez Ufarte, Satrustegi, Idigoras... Eta motz ez geratzearren, baita txuri-urdin “gaztexeago” batzuena ere: Imanol Agirretxe, David Zurutuza, Alberto de la Bella, Xabi Prieto, Ion Ansotegi eta enparauak.

Kultur adierazpenentzat ere izan zen tarterik Saizarren, urtero bezala: Korrontziren trikiti doinuak, Zea Maysen kantuak, Carmona sendiaren flamenko-pop fusioa, Andoni Egañaren bertsoak... Sagardo, futbol eta kulturaren txinparta, elkarri eskutik helduta, 50. aldiz txotxari ohore egiteko.