Kontseiluko zuzendaritzak agerraldia egin zuen atzo Carlos Urquijo Estatu espainiarreko ordezkariak hizkuntzaren arloan egindako esku hartzeak gaitzetsi eta herritarrei erantzuteko deia egiteko. Gipuzkoako Aldundiaren eta beste 37 udalen aurkako ekimenak gogora ekarri zituen Kontseiluko zuzendaritzak, eta, nabarmendu zuenez, gertatutakoak «Estatuak euskararen normalizazio prozesua galgatzea» duela helburu erakusten du, baita «Estatuak bere esku dituen bitarteko guztiak erabiltzeko prestutasuna» duela ere. Hori dela eta, «urgentziazko harreman fase bat» zabaldu du Kontseiluak alderdi eta instituzioekin, eta herritarrak erantzutera deituko dituztela ere iragarri du.