Tolosako Udalak jakinarazi duenez, Gobernu espainoleko ordezkaritzak egindako errekerimenduaren ondoren eta horren gaineko epaiaren bidez behartuta dago ekainaren 2a baino lehen bandera espainola jartzera. Hala, inposizio hori salatzeko, batetik, gaur iluntzeko ohiko osoko bilkuran mozio bat izango dute hizketagai, eta bestetik, larunbat honetan, ikurrin erraldoi bat jarriko dute Plaza Zaharrean ekitaldi berezi batekin, «herri honen benetako nahiaren adierazle moduan». Udalak tolosarrei dei egin die bertan parte hartzera eta etxeetako leiho zein balkoietan inposizio honek dirauen bitartean ikurrinak zabaltzera.