C hepatitisean zuzeneko eragina duten antibiral berriak jasotzeko eskubidea dutela aldarrikatzeko Nafarroako Ospitale Gunean itxialdian diren lagunak Marta Vera Osasun sailburuarekin elkartuko dira astelehenean. Agiri batean, bilera horren garrantzia azpimarratu dute, horren ostean erabakiko baitute tratamendua behar duten pertsona guztiek botikak jaso ditzaten lortzeko hasitako protestarekin jarraituko duten ala Osasun Sailak egindako plana ontzat emanen duten. Herenegun Parlamentuko oposizioko taldeekin egin zuten bilkuran, irizpide ekonomikoen gainetik C hepatitisa duten pertsonen osasunaren alde egiteko konpromisoa eskatu zieten.