Iñigo Urkullu buru izan duen Lakuako Gobernuaren ordezkaritza batek Vendais-Montaliveten (Akitania) izan da, Gernika Bataloiko kideei eginiko omenaldian parte hartzeko.

Bigarren Mundu Gerran, tropa alemaniarren aurka borrokan aritu ziren boluntarioen artean izan ziren Gernika Bataloiko kideak. Jose Antonio Agirrek sustatu zuen, erbestetik, talde honen sorrera. 

Komandante izan zen Kepa Ordoki ere gogoan izan dute gaurko ekitaldian.

Ikurriña eta bandera frantsesa jasotzeaz gain, gudarien omenezko plaka bat aurkeztu eta haritz bat landatu dute.

Alain Rousset Akitaniako presidentea ere izan da bertan. Lakuaren izenean, besteak beste, Josu Erkoreka edo Ana Oregi ere presente egon dira.