CIC nanoGUNEko ikertzaileek, Donostia International Physics Center (DIPC) eta Oviedoko Unibertsitatearekin lankidetzan, nanoirudi espektroskopikoko teknika bat erabili zuten nanoargi infragorriak –polaritoi foniko gisa– eta bibrazio molekularrak nola elkarreragiten duten aztertzeko. Orain, lan hori ‘Nature Photonics’ aldizkari entzutetsuaren martxoko aleko azalean ageri da, ikerketa zentroak ohar batean jakinarazi duenez.

Azaldu duenez, argiak funtsezko zeregina du zientzia eta teknologia modernoetan, komunikazio optiko azkarra, diagnostiko medikoa eta laser kirurgia bezalako aplikazioekin. Aplikazio horietako askotan, argiaren eta materiaren arteko elkarreraginak funtsezko garrantzia du.

‘Nature Photonics’ aldizkarian agertu den lanean lortutako irudiek erakusten dutenez, argi infragorriaren eta bibrazio molekularren arteko elkarreragina hain handia denez, materialaren propietateak ere alda ditzake, hala nola eroankortasuna edo erreaktibotasun kimikoa. Bibrazio-akoplamendu indartsu izeneko fenomeno hori espektroskopia ultrasentagarriko gailuak garatzeko erabil liteke etorkizunean, edo orain arte erabili ez diren bibrazio-akoplamendu indartsuaren alderdi kuantikoak aztertzeko.

Aldizkariaren azaleko irudian polaritoien interferometria ageri da. Nola egin den honela azaldu du CIC nanoGUNEk: «Fonoien polaritoiei (uhin urdina) akoplatutako bibrazio molekularren nanoirudiaren arte-inprimaketa, boro hexagonal nitrurozko geruza fin batean. Nanoirudia egiteko, metal-punta zorroztu batek sakabanatutako argia erregistratzen da, eta punta hori laginaren gainazaletik eskaneatzen da».