Euskotren Liga 2025 itsasora hurbildu da aurten lehendabiziko aldiz. Aurreko asteburuan Bilbon eta Sestaoko ibaietan jardun eta gero, Kontxako badiak, Donostian, hartu du hirugarren bandera. Ez da iazko itsaso txarra egon, baina bai dantza giroa eta lana egin beharra.

Egoera horretan, estropada eremu honetan hirugarren eta laugarren kaleak nahiago dituzte arraunlariek. Eta Tolosaldeak bikain aprobetxatu du hirugarren kalea denboraldiko lehen garaipena lortzeko.

Dena bere alde zuela, gipuzkoarrek hortzak estutu behar izan dituzte azken luzerako azken metroetan. Izan ere, Orio, behetik gora eginda eta olatu ona hartuta, garaipena 'lapurtzeko' oso gertu egon baita. Metroak faltatu zaizkie 'mirotzei' eta bandera Tolosaldeak astindu du.

Atzetik, lehenengo bi banderak irabaztetik zetorren Arraun Lagunakek itsasoaren egoera ordaindu du eta, bigarren kaletik, hasieratik amaiera arte asko sufritu behar izan du. Egia da lehenengo luzean bigarren jarri dela, baina ziabogan Aiora Belartietari arrauna joan zaio maniobra egiterakoan eta denbora asko galdu dute.

Ondoren ezin izan diote egoerari buelta eman eta, behintzat, hirugarren postua eskuratu dute, lehenengo txandan aritu den Hondarribiaren aurretik.

Hondarribia, arantza ondo kenduta

Aipaturiko lehenengo txanda horretan, Hondarribiak ez du aurkaririk izan. Hemen bai nabaria izan dela baita ere kaleen arteko ezberdintasuna. Berdeek laugarren kaletik egin dute arraun eta irteera eman eta berehala ipini dira aurrean.

Justu kontrakoa gertatu zaio Donostiarrari. Nahiz eta estropada eremua bikain ezagutu, etxeko trainerua atzean geratzen hasi da hasiera-hasieratik.

Hibaikak ondo jarraitzen zion Hondarribiari eta atzean, Astillerok eta Donostiarrak lehia polita mantendu dute hirugarren postuarengatik. Gipuzkoarrak pixkanaka aurrera egiten hasi dira, eta Astillero atzean geratzen; baina ziabogan Donostiarra azkena izan da maniobra egiten.

Itzulekoan, Miren Garmendia Hondarribiko patroiak alde batetik bestera dominatu behar izan du trainerua olatuengatik –ondoren aitortu duenez, laugarren kale horretan bazegoen puntu bat olatuak gehiago altxatzen zenekoa–, baina txanda dominatuta izan du. Hori bai, azken metroetan, Hibaikak beste martxa bat hartu du olatu ona hartuta, baina ez da nahikoa izan txandako garaipena ospatu duen "Ama Guadalupekoa" harrapatzeko.

Euskotren Liga - IX. Fabrika Bandera

1. Tolosaldea    11:34.20        
2. Orio      11:36.62
3. Arraun Lagunak     11:50.60
4. Hondarribia      11:53.27
5. Zumaia      12:00.48
6. Hibaika      12:03.21        
7. Astillero      12:19.85
8. Donostiarra      12:26.83

Euskotren Liga - Sailkapen nagusia

1. Arraun Lagunak    22 puntu        
2. Orio      21 p.
3. Tolosaldea     19 p.
4. Zumaia      14 p.
5. Hibaika      12 p.
6. Hondarribia      8 p.
7. Astillero      7 p.
8. Donostiarra      5 p.