Gabonak dira landa turismorako urte sasoi garrantzitsuenetako bat. Familia zabalak edo lagun taldeak elkartzeko garaia, landetxe baten goxotasunean eta Euskal Herriko parajeek eskaintzen dituzten mila aukera gozatzeko asmoz. Pandemia aurreko zifretara iritsi da okupazioa 2023 honetan, eta erreserbak gero eta lehenago egiten dira.

EAEri dagokionez, Nekatur-ek igorritako datuen arabera, okupaziorik altuena Urtezahar gauean izanen da, %85eko batezbestekoarekin. Besteen gainetik, Arabaren datuak nabarmentzen dira. Izan ere, abenduaren 31n, %95eko okupazioa dute landa eremuko ostatuek. Iazko datu bera eta 2019koa (pandemia aurretik) baino zortzi puntu altuagoa. Bizkaian eta Gipuzkoan, aldiz, ez dira pandemia aurreko zenbakietara iristen eta, hurrenez hurren, %73 eta %86ko okupazioa izango da.

Aldiz, urteko azken asteburua osorik hartzen badugu, okupazioa Araban %70ekoa da. Iaz 20 puntu altuagoa izan zen, baina zifra 2019koaren antzekoa da. Bizkaian ere 9 puntu jaitsi da, %57raino, eta Gipuzkoan bi, %68rekin. EAEn, batez beste, %66ko okupazioa egonen da abenduaren 29tik urtarrilaren 1era.

Asteburu honetan, aldiz, okupazioa %57koa izanen da. Arabak dauka hemen ere okupaziorik altuena, %61ekin. Bizkaiak eta Gipuzkoak, aldiz, oso zenbaki antzekoak aurkezten dituzte, %55 inguru. Arabak iaz baino 12 puntu gutxiago ditu eta 2019ko antzeko zenbakia. Bizkaiak, berriz, iazko kopuru berberak ditu, eta pandemia aurreko garaian baino dezente altuagoak (%42 zen 2019an). Gipuzkoan ere okupazioa pixka bat hazi da iazko garai berarekin alderatuz (%52 2022an).

Eta abenduaren 24ko gauari dagokionez, berriz, Bizkaiak dauka okupaziorik altuena, ia %86. Gertutik jarraitzen dio Arabak (%83), eta Gipuzkoak %74ko okupazioa izango du. Bizkaiaren gorakada aipagarria da, 2022. urtearekin alderatuz. Izan ere, iaz %67ko okupazioa izan zuen. Gipuzkoak antzeko zenbakiak izan ditu, eta Araban, aldiz, zazpi puntu jaitsi da.

Idoia Ezkurdiak, Nekaturreko gerenteak, balorazio «ona» egiten du. «Iazko datuak gainditzen ditugu eta 2019koen pare gaude, Urtezaharrean gaindituz». Zentzu berean, «pozik» agertu da, erreserbak «denbora askorekin» egitera ohitzen ari garelako. «Urtean zehar badago joera bat azken uneko erreserbak egiteko, baina Gabonetan, berriz, desberdina izaten da. Badaude urte batetik bestera erreserbatzen dutenak, batik bat familiak. Urtearen erdirako Gabonetako okupazio nahiko altua izaten dugu, eta irailetik aurrera betetzen da».

URTE «ARRAROA»

Nafarroan, berriz, landa ostatuen informazio eta erreserba zentraletik GARAri jakinarazi diotenez, gutxi gorabehera %77ko okupazioa dago alokairu osoko ostatuetan, eta %40 logeletan.

Gabonetako egunen lehen zatian (abenduaren 24 eta 25ean) erreserbak Nafarroako familia taldeenak dira, batez ere, eta Urtezahar eta Urteberri egunetakoak, aldiz, nafarrei beste erkidego batzuetako bisitariak gehitzen zaizkie.

«Okupazio kopuruak ez dira iristen pandemia aurreko zifretara, nahiz eta nazioarteko turista berreskuratu den», nabarmentzen dute. «2023a, oro har, esan behar da urte arraro samarra izan dela; udazkenean lan gutxiagorekin eta Estatuko turismoaren beherakadarekin, neurri batean, nazioarteko turismoaren hazkundeak konpentsatu baitu».

Nahiz eta baden urte batetik bestera Gabonak non igaroko dituen argi duenik, bisitariek, oro har, denbora gutxirekin zehazten dute helbidea. Izan ere, batez ere azken hilabetean egiten dira erreserbak.

MARTINBERIKAN EGUN SOLTERIK EZ

Hiriberri Arakilgo Martinberika landetxea da honen eredu, nahiz eta berezitasunak izan. Bete-beteta dago, gabonak hasi eta bukatu. Ostiral honetatik hasita eta errege eguna igaro arte ez dago hartu gabeko egunik. Gasteiz eta Bilbotik iritsitako lau talde ezberdinek hartu dute hamabi lagunentzat prestatuta dagoen etxea.

Alfonso Nuin arduradunak azaltzen duenez, Gasteizko bi familiak urtero gerturatzen dira Sakanako herri txiki honetara, eta urte batetik bestera egin ohi dute erreserba. Hala ere, duela egun gutxi arte ez ziren azken egunak bete. Gabonetako arrakastara ber-ohitzen ari da Nuin. «Pandemia aurretik dena betetzen genuen eta pandemia ostean ere urtero betetzen ari gara Gabonetan, baina aurten bereziki, ez dago-eta egun solte bakar bat ere». Landetxearen hamabosgarren gabonak izango dira, eta hau gertatzen den lehen aldia da.