Benjamin Netanyahu Israelgo lehen ministroak astelehen honetan esan duenez, Israelgo Armadak «Gazako Zerrendako gune guztiak» kontrolatuko ditu. «Borroka biziak ditugu, izugarriak, eta aurrerapausoak ematen ari dira. Zerrendako gune guztien kontrola hartuko dugu, horixe egingo dugu», adierazi du Netanyahuk Armadako irratiak sare sozialetan partekatutako bideo batean.

Halaber, Gazara laguntza «gutxieneko» sarrera bat baimentzeko erabakia hartu duela ziurtatu du agintariak, enklabean goseteak Israelen aliatuek herrialdeari babes militarra eta diplomatikoa kentzea eragingo duen beldur.

«Gure lagun onenek, Israeli sutsuki laguntzen dioten senatariek (...) hau esaten didate: ‘Garaipena lortzeko behar den laguntza guztia ematen ari gara, armak, babesa, babesa Segurtasun Kontseiluan. Baina gauza bat ezin dugu jasan, ezin dugu gosete masibo baten irudirik onartu’», azaldu du Netanyahuk, AEBei erreferentzia eginez.

Lehen ministroak esan du erabaki «zaila» izan dela gutxieneko laguntza sarrera bat baimentzea, Israelek laguntza humanitarioaren banaketa mugatzeko plana martxan jarri arte. «Denbora hartuko du, lehen puntuak laister ezarriko ditugu, eta gero gehiago gehituko ditugu».

Netanyahuk dio erabaki horri esker Israelek «erabateko garaipena» lortuko duela Gazan eta helburu nagusia beteko duela: Hamas erabat suntsitzea. «Denbora beharko dugu, baina azkenean beteko dugu», ziurtatu du.

«Jaki bat» besterik ez

Bezalel Smotrich Israelgo Finantza ministroak ohartarazi duenez, gazatarrek egunean «pita ogia eta janari plater bat» baino ez dute jasoko. «Eta hori da dena», esan du politikari ultraeskuindarrak mezu batean.

Dioenez, gustatuko litzaioke Gazako Zerrendan «gatz ale bakar bat sartzea saihestea, baita zibilentzat ere? Bai, izan daiteke». «Urte eta erdi daramagu Gazaren itxura desegiten, suntsipen maila osoarekin, eta munduak oraindik ez gaitu gelditu», nabarmendu du.